خدعوكى ..وقالوا : سيبى يعيط !؟
خدعوكي "جدااا" فقالوا:
سيبي الطفل يعيط وهو هيتعود
سيبي الطفل يعيط أصله ذكي وعارف انه كدة هيأثر عليكي
سيبي الطفل يعيط وقوي قلبك يا كدة يا مش هتعرفي تربي
وخدعوكي "جدااا جدااا" لما قالوا:
سيبيه يعيط جامد عشان يجوع وياكل
سيبيه يعيط جامد عشان ينام
كل الكلام ده غلط.. ولا يمت للرحمة بصلة!
لا مناهج التربية بتقول كدة ولا الطب النفسي للأطفال!.
والمصيبة إن الكلام ده أوقات بيخرج من دكاترة!!
الدكتور اللي يقولك كدة فورا ومن غير تفكير تسيبيه.
الدكاترة اللي بتفهم لما تروحيلهم تشتكي من عياط طفلك يقولولك لبي احتياجه! انه بيعيط أو بيتعصب معناها أنه بيعبر عن نفسه ودي صحة نفسية وعصبية.
تأكدي إن أغلب اللي بيضايقك من تصرفات طفلك بيكون وراها دلالات مهمة جدا وجميلة تدل إن الطفل ده سوي.
احنا اللي عايزين أطفالنا نحطهم يتحطوا ونقولهم بس يتبسوا! عشان هو ده موروثنا الثقافي للأسف..
احنا واصلنا ان الطفل الهادي اللي مابيقولش لأ ده هو نعم الأطفال. في حين إن الطفل ده طلع كدة نتيجة إهمال وجفاء من أهله (غير مقصود طبعا) في ظنهم انهم كدة بيربوه وبيقووا شخصيته.
اللي بيحصل انه بيعيط لأنه له احتياج شايفك قدامه ونازل بالفطرة فاهم إنك هتلبيه.. لما يفضل يعيط ويعيط وانتي تطنشي هيجيله يأس وإحباط وفعلا هيتعود .. بس هيتعود على ايه وبأي نفسية؟؟
عملوا تجربة الفئران الأمهات عشان يقيسوا أثر العاطفة على سلوك أطفالهم. عزلوا فارتين كل فارة معاها طفلها. فارة فيهم مستوى العاطفة مع طفلها عندها أقل من التانية. وجم يختبروا بعد مدة سلوك الطفلين دول فحطوا كل واحد فيهم فيهم في قفص وبعدها دخلوا جسم غريب جوه القفص وراقبوا ردود أفعالهم.
الفار اللي أمه عاطفتها عالية خد مدة خوف من الجسم الغريب دقيقتين وبعدين راح يستكشف بكل فضول الجسم ده مدة طويلة ولما اكتفى تأقلم مع الجسم وكأنه مش موجود . (جرأة - فضول - حب اكتشاف - تأقلم)
الطفل اللي أمه عاطفتها أقل لما شاف المجسم فضل خايف منه 10 دقايق كاملين وبعدها قرب من الجسم بحذر يستكشفه وثواني وساب الجسم ورجع في ركن تاني. (خوف وذعر)
الدرس واضح :)
احنا بنحطم أطفالنا وبنكسر أجنحاتهم بجهلنا وقلة صبرنا للأسف..
يعني ايه يعيط عشان يجوع؟؟ يعني ايه يعيط عشان ينام؟؟ ليه نوصلهم للانهيار العصبي ده؟؟
انتي كأم لما بتنهاري جدا من العياط فعلا بتنامي ..حطي نفسك مكانه.. هل هي دي النفسية اللي عايزاه ينام بيها كل يوم؟ وعايزاه نفسه تتفتح وياكل؟ وعايزاه يثق فيكي؟
هل هي دي الصورة اللي ترتضيها لنفسك في نظر طفلك؟
هل انتي كانسانة تقبلي تتعاملي بنفس الطريقة؟
عيالنا بني آدمين وبيحسوا وعندهم كرامة ..
لما تعوديه على القهر وعلى العياط والضرب والقرص والتبكيت و و .. غير انك هتحصدي الكلام ده قلة ثقة وهتضيعي على نفسك علاقة أقوى ما تكون .. هيطلع انسان سلبي ومؤذي أو ماعندوش شجاعة يدافع عن نفسه ضد أذى. هيتعود يمشي ورا اللي يتقاله يمشي وراه وبس ..
احضني طفلك أوي وماتسمحيش نهائي لحد يقطع حبال الحب الفطرية والعلاقة المتينة بينك وبينه بنصايح ماترضيش ربنا ولا ترضي أي إنسان سوي.
الرعاية تفرق عن التربية.. انك تراعيه يعني تأكليه وتشربيه وتلبسيه وتصرفي عليه ده مهم جدا طبعا .. بس مش أهم من تربيتك وبنائك لشخصيته ولصحة نفسيته وتنمية ذكائه وتطوير معاراته وقدراته.. ده اللي هيكمل معاه. والثمرة الناجحة أوي دي بإذن الله هي اللي عشانها بنفني ذاتنا دلوقتي وده واجب علينا ورسالتنا وأمانة ربنا عندنا
ليست هناك تعليقات